அந்த கோடைக்காலம் சியோக்ஸ் முகாமில் அமைதியாக கழிந்து கொண்டிருந்தது.
இடிக்குட்டியும் யகரியும் ஆற்றுக்கு குளிக்க சென்றனர். ஆற்றில் சிறிது விளையாடிய பின் நதியின் முடிவுப்பகுதிக்கு சென்று பார்க்க விரும்பினர்.
வழியில் ஆற்றின் குறுக்கே பாலம் போன்று அமைந்திருந்த மரக்கட்டைகளின் குவியல் மீது ஏறி கடக்க முயலும்போது ஆயிரம் வாயன் எனும் பீவெர் 'பொறுக்கிகளே மற்றவர்களின் வேலையைக் கெடுக்காதீர்கள். சீக்கிரம் கீழே இறங்குங்கள் கொள்ளைக்காரர்கள் , நாசக்காரர்கள்' என பலவாறு அர்ச்சனை செய்தான்.
குழப்பமுற்ற யகரியும் இடிக்குட்டியும் மரக்கட்டைகள் மீதிருந்து கீழே இறங்கினர்.
அப்போது ' என்ன நடக்கிறது? ' என கேட்டவாறு வரும் மர அணை என்ற பீவெரிடம் ஆயிரம் வாயன் ' இந்த பிடரி மயிர் கொண்ட நான்கு கால் பிராணியும், இறகு அணிந்த இரண்டுகால் பிராணியும் அணை மீது ஏறி வேலையை நாசம் செய்கின்றனர்' என புகார் செய்தான்.
அணையை பரிசோதித்த மரஅணை, 'தீவிரமான பாதிப்பு ஏதுமில்லை' என ஆயிரம் வாயனை அமைதிப்படுத்தி விட்டு, யகரியும் இடிக்குட்டியும் பயந்து ஓடிப்போகாமல் இருந்ததை பாராட்டினார். பின்னர், தாங்கள் பீவெர் பழங்குடிகள் என்றும் அங்கு அணை கட்டி வசிக்கப் போவதாகவும் யகரிக்கு விளக்கினார்.
' தண்ணீரிலா வசிக்கப் போகிறீர்கள்?' என வியப்புடன் கேட்டான் யகரி.
அப்போது சில பீவெர்கள் மரக்கட்டைகளை கொண்டு வந்தன. ஆயிரம் வாயன் 'வேலை செய்பவர்களின் பாதையை மறிக்காமல் ஒதுங்கி இருங்கள்' என்று சிடுசிடுத்தான்.
பீவெர்களில் ஒன்று இடிக்குட்டி மீது சவாரி செய்ய ஆசைப்பட்டது. யகரியும் சம்மதித்தான். அதைப்பார்த்த மற்ற பீவெர்களும் ஆயிரம் வாயனின் ' வேலை என்னாகிறது?' என்ற புலம்பலை மீறி இடிக்குட்டி மீது ஏறி அமர்ந்தன.
இதனால் கடுப்பான இடிக்குட்டி 'உங்களுக்கு குதிரைச்சவாரி வேணுமோ?' என்று புன்னகையுடன் கேட்டு, புயல் வேகத்தில் கிளம்பியது. அதன் பாய்ச்சலில் பீவெர்கள் ஒவ்வொன்றாக தூக்கியெறியப்பட்டன. இடிக்குட்டியின் பாதையில் அணை குறுக்கிட, ஆயிரம் வாயன் அணையின் கதியைப்பற்றி கவலைப்பட்டுக் கதற, இடிக்குட்டி ஒரே தாவலில் அணையை தாண்டி சாகஸம் செய்தது.
ஆயிரம் வாயன் ' அந்தக்குதிரை என்னை வெறிகொள்ளச்செய்கிறது, வெட்டி கூறு வைச்சுடுவேன். என கொந்தளித்தான்.
பின்னர் குதிரைச்சவாரியில் நீண்ட நேரம் சென்று விட்டது, மீண்டும் வேலைக்குத் திரும்புங்கள்.' என உத்தரவிட்டான்.
மர அணை யகரியிடம் 'சுண்ணாம்பு, மண் மற்றும் உதிர்ந்த இலைகளைக் கொண்டு அணையை பூசுவோம், நீரின் வேகம் குறைந்த பின் எங்கள் குடிசைகளைக் கட்ட ஆரம்பிப்போம்' என்று தெரிவித்தார்.
மீண்டும் வருவதாகக் கூறி கிளம்பினான் யகரி.
'
நீங்கள் போனால் ரொம்ப உபயோகமா இருக்கும், எதையும் சேதப்படுத்தாதீங்க' என ஆயிரம் வாயன் கூறினான்.
'எப்போது வேண்டுமானாலும் வாருங்கள்' என மரஅணை புன்னகையுடன் வழியனுப்பினார் .
'அருமையான பீவெர்கள்' என்றான் யகரி.
'கொஞ்ச பேரு ஓவரா கூவுறாங்க' என்றது இடிக்குட்டி.
அப்போது அவர்களுக்கு 'லிண்டென் மரம்' எனும் சுட்டித்தனம் நிறைந்த பீவெர் குட்டி அறிமுகமாகிறது.
( Linden என்பது Tiliaceae குடும்பத்தைச் சேர்ந்த மரவகை)
சிலநாள் கழித்து மீண்டும் பீவெர்களை பார்த்து வர இடிக்குட்டியுடன் கிளம்பினான் யகரி.
வழியில் பெரிய மரம் ஒன்றை வீழ்த்த முயன்று கொண்டிருந்த இரட்டைப்பல்லன் என்ற பீவெரை சந்தித்தனர். தன்னுடைய ஓய்வு நேரத்தில் சிறந்த கலைப்படைப்பு ஒன்றை படைக்க இருப்பதாக இரட்டைப்பல்லன் தெரிவித்தான்.
'இரட்டைப்பல்லன் மற்ற பீவெர்களிடமிருந்து வித்தியாசமாகக் காணப்படுகிறார்' என்றான் யகரி.
தான் ஒரு 'கலைஞன்' என்பதால் அப்படித் தெரியலாம் என்றான் இரட்டைப்பல்லன்.
அப்போது 'காட்டுரோஜா' என்ற பீவெர் இலைகளை சேகரித்துக் கொண்டிருப்பதையும், கரடி ஒன்று அவளை தாக்க வருவதையும் கண்டனர்.
இட்டைப்பல்லன் மின்னல் வேகத்தில் மரம் ஒன்றை வெட்டித்தர, அதன் மூலம் கரடியை தாக்கி விரட்டினான் யகரி.
காட்டு ரோஜா யகரிக்கு நன்றி சொன்னாள்.
அனைவரும் இரட்டைப்பல்லன் இன்னும் வேலைக்குத் திரும்பாதது பற்றி ஆயிரம் வாயன் கடுகடுத்துக் கொண்டிருந்த நேரத்தில் அணை கட்டும் இடத்தை சென்றடைந்தர்.
இரட்டைப்பல்லன் யகரியின் சாகஸத்தை மற்றவர்களுக்கு விவரித்தான்.
காட்டு ரோஜா யகரியும் இடிக்குட்டியும் தைரியமானவர்கள் என்று பாராட்டினாள்.
அப்போது முரட்டுப்பலகை, காட்டு ரோஜா தம்பதியின் சுட்டி வாரிசான லிண்டென் மரம் அவர்களை 'வல்லமை மிக்கவர்கள்' என்று கூறினான். காட்டு ரோஜா லிண்டென் மரத்திடம், 'எதையும் மிகைப்படுத்திச் சொல்லக்கூடாது' என்று கூறினாள்.
யகரி மர அணையிடம், வேலையில் நல்ல முன்னேற்றத்தைக் காண்பதாக கூறினான்.
'இன்னும் சில நாட்களில் குடிசைகள் தயாராகி விடும்' என்று மரஅணை தெரிவித்தார்.
அப்போது ஆயிரம் வாயன் யகரி, இரட்டைப்பல்லன், இடிக்குட்டி ஆகியோரை அணையின் கரையை வலுப்படுத்த மேலும் மரங்கள் சேரிக்க அழைத்தான்.
மரங்கள் அடர்ந்த பகுதியில் 'மரப்படுக்கை' என்னும் எப்போதும் குறட்டை விட்டுத்தூங்கும் இயல்பு கொண்ட பீவெரை சந்தித்தனர். ஆயிரம் வாயன் அந்த சோம்பறியை எழுப்பி விட்டும் அவன் மீண்டும் தூங்கி விடுகிறான்.
மரங்களை இரட்டைப்பல்லன் வெட்டித்தர, அனைத்தையும் இடிக்குட்டி இழுத்து வந்தது. ஆயிரம் வாயன் மூவர் அணியின் திறமையை பாராட்டினான்.
திரும்பும் வழியில் மரப்படுக்கையை மீண்டும் சந்தித்தனர். மரக்கட்டைகளின் குவியலைக் கண்டு 'அற்புதம்' என குதுகலிக்கும் மரப்படுக்கை அதன் மீதே ஏறிப்படுத்து தூங்கி விட்டான். மரப்படுக்கையை திருத்த முடியாது என்று ஆயிரம் வாயன் அலுத்துக் கொண்டான்.
அந்த ஊர்வலத்தை காணும் கடமான் ஒன்று 'எதுவும் வளர்ச்சியை தடுக்க முடியாது' என்று கூறியது.
மரத்தடிகளை அணைப்பகுதியில் சேர்த்த பின் களைத்துப் போன யகரியை 'மறுநாளும் வருவாயா?' என ஆயிரம் வாயன் கேட்கிறான். யகரி பதிலளிக்கும் முன், காட்டு ரோஜா, பிர்ச் மரப்பட்டைகளை உண்ண. யகரியை அழைத்தாள். மறுநாள் வருவதாக கூறி கிளம்பினான் யகரி. வீடு திரும்பும் வழியில் இரட்டைப்பல்லன் இன்னமும் களைப்பின்றி வேலை செய்யும் சத்தம் கேட்கிறது.
அப்போது எருமை விதையின் அம்பு ஒன்று அவர்களை உரசாத குறையாக கடந்து மரத்தில் பதிந்தது.
அவர்களை வேட்டைக்கான விலங்கு என நினைத்து விட்டதாக தெரிவித்தான் எருமை விதை.
' ஒரு உண்மையான வேட்டைக்காரன் வில்லை நீட்டும் முன் கண்களை திறந்து வைத்துக்கொள்வான்' என யகரி அவனை எச்சரித்தான் .
யகரியை 'இன்றும் விளையாட வரவில்லையே? ' என ஆச்சரியத்துடன் வினவினாள் வானவில்.
ஆற்றுப்பகுதியில் வேலை செய்ததாக தெரிவித்தான் யகரி, வேலையா? என வியந்தாள் வானவில்.
இடிக்குட்டியிடம் 'நமக்கு நல்ல உறக்கம் தேவை! காலையில் சீக்கிரம் எழ வேண்டும்.' என தெரிவித்தான் யகரி. அதை மறைந்திருந்து கேட்கும் வானவில் தானும் காலையில் சீக்கிரம் எழ தீர்மானிக்கிறாள்.
மறுநாள் அதிகாலையில் யகரி கிளம்பும்போது வானவில் தானும் வருவதாக கூறினாள். முதலில் தயங்கும் யகரி வானவில்லின் ஏமாற்றத்தை உணர்ந்து சம்மதித்தான்.
வழியில் பெர்ரி பழங்களை சேகரிக்கிறான் யகரி, காரணம் கேட்கும் வானவில்லுக்கு 'பிர்ச் மரப்பட்டைகளை விட இது நன்றாக இருக்கும்.' என்றான்.
ஆற்றை நெருங்கும்போது இரட்டைப்பல்லன் வேலை செய்யும் சத்தம் கேட்கிறது. புரியாமல் விழிக்கும் வானவில்லுக்கு யகரி, அணைப்பகுதியில் அனைத்தும் புரியும் என பதிலளித்தான்.
அணைப்பகுதியில் காட்டு ரோஜா 'லிண்டென் மரம்' காணாமல் போய் விட்டதாக கூறுகிறாள்.
முரட்டுப்பலகையும் ஆயிரம் வாயனும் லிண்டென் மரம் வழக்கமாக விளையாடும் ஆற்றின் கீழ்ப்பகுதிக்கு அவனைத்தேடி போயிருப்பதை தெரிந்து கொண்ட யகரி அங்கே விரைகிறான்.
அங்கு நிகழ்பவை புரியாமல் குழம்பும் வானவில்லுக்கு விவரங்களை எடுத்துக்கூறி, தனக்கு விலங்குகளுடன் பேசும் திறமை இருப்பதை இரகசியமாக வைத்திருக்கும்படி சொல்கிறான்.
ஆற்றுப்பகுதியில் முரட்டுப்பலகையையும் ஆயிரம் வாயனையும் கண்டார்கள், லிண்டென் மரம் இன்னும் அதிக தூரத்தில் இருக்கலாம் என்றான் ஆயிரம் வாயன். அவர்களை தாண்டி விரைவாக அருவிப்பகுதியை வந்தடைகிறது யகரியின் குழு.
அங்கு லிண்டென் மரத்தை கண்டு பிடிக்க முடியவில்லை. நீர்வீழ்ச்சியில் லிண்டென் மரம் மூழ்கியிருக்கலாம் என்ற முடிவுக்கு அவர்கள் வருகின்றனர்.
அப்போது யகரியின் குலதெய்வமான பெரும் கழுகார் அங்கு வருகிறார். அவர்கள் லிண்டென் மரத்தை இழக்கவில்லை என்றும் ஆற்றுநீர் நிலத்தடியில் ஓடும் ஒரு குகைப்பகுதிக்குள் அவன் உயிரோடு இருக்கிறான் என்றும் தைரியம் அளித்துச் செல்கிறார்.
தாமதிக்காமல் நிலத்தடி ஆற்றுக்குள் பாய்ந்து செல்லும் யகரி லிண்டென் மரத்தை ஒரு குகைப்பகுதியில் கண்டு பிடித்தான். அங்கிருந்து வெளியேற முடியாத வண்ணம் மேல் திறப்பு வெகு உயரத்தில் உள்ளது. வானவில்லும் இடிக்குட்டியும் கவலைப்படத் துவங்கிய நேரத்தில் யகரியின் குரல் கேட்டு விரைந்தனர். யகரியின் யோசனைப்படி முரட்டுப்பலகையும் ஆயிரம் வாயனும் ஒரு பெரும் மரத்தை ஏணி போல் செதுக்கித்தர, அதன் உதவியுடன் லிண்டென் மரமும் யகரியும் மேலேறி வந்தனர்.
லிண்டென் மரம் தன் தந்தையிடம் 'வாழ்க்கைல இப்படி ஜாலியா இருந்ததில்ல அப்பா!' என்று உற்சாகமாக கூறினான். மேலும் அதே விளையாட்டை மீண்டும் விளையாட யகரியை அழைத்தான். இதனால் கடுப்பான முரட்டுப்பலகை லிண்டென் மரத்தை குப்புறப் போட்டு நாலு சாத்து சாத்தினான்.
இதற்கு முன் இப்படி சாத்து வாங்கியதில்லை என்று கூறினான் லிண்டென் மரம், வாழ்க்கையில் எல்லாவற்றுக்கும் 'முதல்முறை என்பது உண்டு' என்றது இடிக்குட்டி.
காட்டு ரோஜாவும் மற்ற பீவெர்களும் லிண்டென் மரம் நலமாக திரும்பி வந்ததில் மகிழ்வடைந்தனர்.
மூன்று நாட்களில் கிராமம் முழுமை பெற்று விடும் என்று மர அணை கூறினார். '
ஒருவழியாக நாம் பிர்ச் மரப்பட்டைகளை ருசிக்கலாம்' என்று கூறினாள் காட்டு ரோஜா.
அப்போது பூம்ம்! என்று பெரும் சத்தம் எழுந்தது.
அது என்ன? என்றாள் காட்டுரோஜா
பூகம்பமோ? என்றான் முரட்டுப்பலகை
இடியோசையோ? என்றான் ஆயிரம் வாயன்
யாரோ கூப்பிட்ட மாதிரி இருந்ததே? என்றான் மரப்படுக்கை
'பயப்பட வேண்டாம்! அது இரட்டைப்பல்லனின் வேலையாகதான் இருக்கும்' என்று கூறினான் யகரி
அடுத்த மூன்று நாட்களில்
இரட்டைப்பல்லன் தன்னுடைய இரகசிய கலைப்படைப்பை உருவாக்கி யகரி குழுவினரின் உதவியுடன் நதியில் சேர்க்கிறான்.
அணை மற்றும் குடிசைகள் கட்டும் வேலை முடிந்து பீவெர்களின் கிராமம் வசிக்க தயாராகி இருந்தது.
அப்போது இன்ப அதிர்ச்சியாக இரட்டைப்பல்லனின் கலைப்படைப்பு அங்கு வந்து சேர்கிறது.
அதை அனைவரும் பாராட்டி மகிழ்ந்தனர்.
லிண்டென் மரம் அதில் ஏறி உற்சாகமாக விளையாடத் துவங்கினான்.
அணையை உருவாக்க உழைத்த உழைப்பாளிகளின் நினைவுச்சின்னம் நதியின் அணைப்பகுதியில் பெருமையுடன் நின்றது. அங்கே கொண்டாட்டங்கள் துவங்கின.
முற்றும்
*******
Linden tree
Beaver
பழுப்பு நிற மென்மயிரும் அகன்ற தட்டையான வாலும் கூர்மையான பற்களும் உடைய, நிலம், நீர் இரண்டிலும் வாழும், ஆறுகளின் குறுக்கே மரக்கிளைகளைக் கொண்டு அணையிடும் விலங்கு வகை;
பீவெர் என்பது பகுதி-நீர்வாழ் (semi-aquatic) கொறி உயிரி (rodents) ஆகும். இது தென் அமெரிக்காவையும் ஐரோப்பாவையும் இயற்கை வசிப்பிடமாக கொண்டது.
பீவெர்கள் ஆற்றில் அணைகட்டி குளம்போல அமைத்து அங்கு சிறு தடிகள் தாவரங்கள் போன்றவற்றை கொண்டு தங்களது இருப்பிடத்தினை அமைத்து வாழும். இச்செயல்பாட்டில் இவை ஈடுபடும் நேர்த்தி, சுறுசுறுப்பு பீவெர்கள் பலரை கவர காரணமாய் அமைந்துள்ளது.
உலகில் இரண்டாவது பெரிய கொறி உயிர் இதுவேயாகும். பீவெர்கள் தங்கள் வாழ்க்கைக்காலம் முழுதும் வளர்கின்றன. முதிர்ந்த பீவெர்கள் சுமார் 25 கிலோ வரை எடையுள்ளவை. பெண் நீர் எலிகள் ஆண்கள் அளவுக்கோ அல்லது அவற்றிலும் பெரிதாகவோ வளர்கின்றன. இது பொதுவாக வேறு பாலூட்டிகளில் காணப்படாத தன்மையாகும்.
ஐரோப்பிய நீர் பீவெர்கள் ஒரு நிலையில் அவற்றின் உரோமத்துக்காகவும், ஒருவகை வாசனைத் திரவியத்துக்காகவும் வேட்டையாடப்பட்டு அழியும் நிலையிலிருந்தன. எனினும் பின்னர் மீண்டும் ஐரோப்பா முழுவதும் கொண்டுவரப்பட்டுள்ளன. தற்பொழுது, எல்பே (Elbe), ரோன் (Rhone) ஆகிய இடங்களிலும், ஸ்கண்டினேவியாவின் பகுதிகளிலும், பீவெர்கள் ஆயிரக்கணக்கில் வாழ்கின்றன. பவேரியா, நெதர்லாந்து ஆகிய இடங்களுக்கும் இவை புதிதாகக் கொண்டுவரப்பட்டுள்ளதுடன், அவை புதிய இடங்களுக்கும் பரவி வருகின்றன. ஐக்கிய இராச்சியத்தில், பீவெர்கள், 17 ஆம் நூற்றாண்டளவில் அழிந்துவிட்டன.
அமெரிக்க பீவெர் கனடாவின் தேசிய விலங்காகும். இது கனடாவின் ஐந்து சத நாணயத்தில் இடம் பெற்றுள்ளதுடன், அந்நாட்டின் முதலாவது தபால்தலையிலும் இடம் பெற்றிருந்தது. எனினும் நாட்டின் பல பகுதிகளில் இது தொல்லை கொடுக்கும் பிராணியாகக் கருதப்படுகிறது.
*******
